1Ch 29 | NdeIBE | STEP | Inkosi uDavida yathi ebandleni lonke: “Indodana yami uSolomoni, yena kanye osekhethwe nguNkulunkulu, usesengumfana njalo usesemutsha. Umsebenzi mkhulu, ngoba lesisakhiwo sobukhosi ayisiso esomuntu kodwa ngesikaJehova uNkulunkulu.

1 Chronicles 29

Izipho Zokwakha Ithempeli

1 Inkosi uDavida yathi ebandleni lonke: “Indodana yami uSolomoni, yena kanye osekhethwe nguNkulunkulu, usesengumfana njalo usesemutsha. Umsebenzi mkhulu, ngoba lesisakhiwo sobukhosi ayisiso esomuntu kodwa ngesikaJehova uNkulunkulu. 2 Sengilungiselele ngayo yonke inzuzo engilayo ukwakhiwa kwethempeli likaNkulunkulu wami – igolide lokwenza izinto zegolide, isiliva sokwenza izinto zesiliva, ithusi lokwenza izinto zethusi, lensimbi yokwenza izinto zensimbi, lezigodo zokwenza izinto zezigodo, kanye lohlobo lwamatshe e-onikisi, lamatshe okubekwa, lamatshe okucecisa, lalemibala, lenhlobonhlobo zonke zamatshe amahle lamatshe alukhuni amanengi – konke lokhu ngikubuthelele ngakunengi. 3 Ngaphandle kwalokho, ngenxa yokutshisekela kwami ithempeli likaNkulunkulu wami, manje senginikela inotho yami yegolide lesiliva ethempelini likaNkulunkulu wami ngaphezu kwakho konke engikulethileyo ethempelini leli elingcwele: 4 ngamathalenta egolide azinkulungwane ezintathu egolide (igolide lase-Ofiri) lamathalenta esiliva esicengekileyo azinkulungwane eziyisikhombisa okokugudula ngalo imiduli yezindlu, 5 okomsebenzi wegolide lokomsebenzi wesiliva lokwawo wonke umsebenzi ozakwenziwa yizingcitshi. Ngakho, ngubani ofuna ukuzinikela kuJehova lamuhla?”

6 Abayizinhloko zezindlu, izikhulu zezizwana zako-Israyeli, abalawuli bezinkulungwane labalawuli bamakhulu, lezikhulu ezazikhangele ngokuqhutshwa komsebenzi wenkosi bapha ngokuzinikela. 7 Banikela emsebenzini wethempeli likaNkulunkulu amathalenta ayizinkulungwane ezinhlanu lezinhlamvu zegolide ezizinkulungwane ezilitshumi, lamathalenta esiliva ayizinkulungwane ezilitshumi, amathalenta ethusi ayizinkulungwane ezilitshumi laficamibili, lamathalenta ayizinkulungwane ezilikhulu ensimbi. 8 Loba ngubani owayelamatshe aligugu wawanikela endlini yenotho yethempeli likaJehova yona

eyayiphethwe nguJehiyeli umGeshoni. 9 Abantu baba lokujabula okukhulu bebona ukuzinikela kwabakhokheli babo, ngoba banikela kuJehova ngokukhululeka langezinhliziyo zabo zonke. UDavida inkosi laye wajabula kakhulu.

Umkhuleko kaDavida

10 UDavida wamdumisa uJehova phambi kwebandla lonke esithi: “Kawudunyiswe, Wena Jehova, Nkulunkulu ka-Israyeli ukhokho, kusukela nininini kuze kube nininini.

11 Bungobakho, O Jehova, ubukhulu lamandla lodumo lobukhosi; ngoba konke okusezulwini lokusemhlabeni kungokwakho. Bungobakho, O Jehova, ubukhosi; uphakeme wena phezu konke.

12 Inotho lodumo kuvela kuwe; ungumbusi wazo zonke izinto. Esandleni sakho kukhona ukuqina lamandla. Kukuwe ukuphakamisa lokupha amandla kubo bonke.

13 Siyakubonga khathesi, Nkulunkulu wethu, silidumisa ibizo lakho elilodumo.

14 “Kodwa mina ngiyini, bayini abantu bami, ukuthi sinikele ngenhliziyo yonke na? Konke kuvela kuwe, thina sikunike kuphela lokho okuvela esandleni sakho. 15 Singabezizweni lezethekeli emehlweni akho, njengoba labokhokho bethu bonke babenjalo. Izinsuku zethu emhlabeni ziyafanana lesithunzi, asisilutho, kalikho ithemba. 16 O Jehova Nkulunkulu wethu, lokhu esesikunikele ngobunengi bakho ekwakhiweni kwethempeli eliyindawo yeBizo lakho eliNgcwele, kuvela esandleni sakho, njalo konke kuvele kungokwakho. 17 Ngiyazi, Nkulunkulu wami, uhlola inhliziyo njalo uyabuthanda ubuqotho. Zonke lezizinto ngizinikele ngokufisa langenhliziyo yobuqotho. Khathesi ngikhangele ngentokozo abantu bakho abalapha ukuthi banikele ngesifiso kuwe. 18 O Jehova, Nkulunkulu wabobaba o-Abhrahama, lo-Isakha lo-Israyeli, yenza izinhliziyo zabantu bakho zime ngalokhu kulangatha, njalo izinhliziyo zabo zibe kuwe kuze kube nininini. 19 Phana uSolomoni, indodana yami, inhliziyo epheleleyo ukuze agcine imilayo yakho lemithetho yakho lezimiso zakho, lokuthi akhe lesisakhiwo esiyisigodlo mina esengisilungiselele.”

20 UDavida wasesithi kulo lonke ibandla, “Dumisani uJehova uNkulunkulu wenu.” Ngakho bonke bamdumisa uJehova, uNkulunkulu wabokhokho babo, bathi mbo ngobuso phansi, bekhonza uNkulunkulu, behlonipha inkosi.

USolomoni Ugcotshwa Ubukhosi

21 Ngosuku olulandelayo banikela imihlatshelo kuJehova leminikelo yokutshiswa: izinkunzi eziyinkulungwane, lezinqama eziyinkulungwane lamazinyane amaduna ayinkulungwane, leminikelo yokunathwayo, layo yonke eminye imihlatshelo banikela ngokunengi benikelela bonke abako-Israyeli.

22 Badla banatha ngokujabula okukhulu ngalolosuku phambi kukaJehova. Basebememukela okwesibili uSolomoni indodana kaDavida, bamgcoba phambi kukaJehova ukuthi abe ngumbusi, kuthi uZadoki abe ngumphristi. 23 USolomoni wasebusa embusweni kaJehova uNkulunkulu esikhundleni sikayise uDavida. Waphumelela njalo wonke u-Israyeli wamlalela. 24 Izikhulu zonke kanye lamaqhawe, ndawonye lamadodana eNkosi uDavida bazinikela ngaphansi kombuso weNkosi uSolomoni.

25 UJehova wamphakamisa kakhulu uSolomoni wamnika isithunzi phezu kwabo bonke abako-Israyeli, njalo wamnika ubukhosi obungazange bube khona esikhosini kwabako-Israyeli.

Ukufa KukaDavida

26 UDavida indodana kaJese wayeyinkosi yabo bonke abako-Israyeli.

27 Wabusa kwabako-Israyeli iminyaka engamatshumi amane – eyisikhombisa eHebhroni kwathi engamatshumi amathathu lantathu eJerusalema. 28 Wafa eseluphele eseleminyaka eminengi kakhulu lenotho lodumo; uSolomoni indodana yakhe waba yinkosi esikhundleni sakhe.

29 Izehlakalo zombuso weNkosi uDavida kusukela ekuqaleni kuze kube sekupheleni, zilotshiwe egwalweni lwembali kaSamuyeli umboni, egwalweni lwembali kaNathani umphrofethi kanye lasegwalweni lwembali kaGadi umboni. 30 Kubalwa ukubusa kwakhe ngokugcweleyo, amandla lakho konke okwakusenzakala kuye lakwabako-Israyeli leminye imibuso yawo wonke amanye amazwe.